Örkin hans Nóa á hvíta tjaldið

Bandaríski leikstjórinn Darren Aronofsky hefur fengið Paramount-kvikmyndaverið til að fjármagna næstu kvikmynd sína, Noah. Eins og nafnið gefur til kynna fjallar myndin um Nóa og þær miklu byrðar sem Guð Gamla testamentisins leggur á hann þegar honum er falið að byggja örk og bjarga öllum tegundum jarðar undan syndaflóðinu. Myndin mun að öllum líkindum kosta minnst 130 milljónir dollara í framleiðslu og er gert ráð fyrir að tökur hefjist strax á næsta ári.

Verkefnið hefur verið lengi í bígerð en leikstjórinn ræddi það fyrst árið 2007 við kvikmyndatímaritið Empire. Hins vegar hefur gengið erfiðlega að fá kvikmyndaverin til að fjármagna það, þar til nú. „Síðan í barnæsku hef ég verið heillaður af sögunni um Nóa og ferðalagi fjölskyldu hans. Sagan hefur verið mörgum mikill innblástur og mig langar virkilega til að sýna ástríðu Nóa á hvíta tjaldinu.“ Aronofsky hefur einnig lýst því yfir að hann vilji hafa myndina eins raunverulega og hægt er. „Hún verður ekki á gamansömum nótum eins og tíðkast hefur um Nóa-myndir heldur verður hún meira í ætt við vísindaskáldsögu.“

Aronofsky er sennilega einhver frumlegasti leikstjóri Hollywood um þessar mundir. Kvikmyndir hans hafa hlotið einróma lof gagnrýnenda en á ferilskrá hans eru meðal annars The Black Swan, The Wrestler og Requiem for a Dream.- fgg