Frumsýningafjör um helgina

Það verður mikið fjör í kvikmyndahúsum borgarinnar um helgina, þrjár íslenskar myndir verða frumsýndar, verðlaunamyndir frá Norðurlöndum keppast um áhorfendur í Bíó Paradís og Hollywood verður á sínum stað.

Þriðja Sveppamyndin, Algjör Sveppi og töfraskápurinn, verður frumsýnd í Sambíóunum á föstudag. Fyrstu tvær myndirnar nutu mikilla vinsælda og að þessu sinni þurfa þeir Sveppi, Gói og Villi að kljást við illmenni sem ásælist skápinn hans Sveppa.

Sambíóin frumsýna einnig hryllingsmyndina Fright Night með Colin Farrell í aðalhlutverki. Þar leikur írska sjarmatröllið vampíru sem flytur í dæmigert bandarískt úthverfi og gerir allt brjálað.

Íslenska heimildarmyndin Ge9n fjallar um réttarhöldin yfir níumenningunum sem voru kærðir fyrir árás á Alþingi í desember 2008. Leikstjóri er Haukur Már Helgason en myndin er sýnd í Bíó Paradís. Þar verða einnig sýndar þær myndir sem tilnefndar eru til kvikmyndaverðlauna Norðurlandaráðs. Þá verður einnig frumsýnd heimildarmyndin Mótvægi sem fjallar um Bryndísi Pétursdóttur garðyrkjufræðing.

Heimildarmyndin Knuckle verður einnig tekin til sýningar um helgina, en hún var tólf ár í vinnslu. Hún segir frá því hvernig þrjár írskar fjölskyldur leysa aldagamlar deilur sínar með blóðugum hnefaleikabardögum.

Kvikmyndin Colombiana sem kemur úr smiðju Luc Besson verður frumsýnd í Laugarásbíói en myndin segir frá ungri stúlku sem verður vitni að morði foreldra sinna og ákveður að gerast leigumorðingi. Zoe Zaldana úr Avatar leikur aðalhlutverkið.

Síðust en ekki síst er það síðan Melancholia Lars von Trier með Kirsten Dunst í aðalhlutverki, en myndin hefur hlotið einróma lof gagnrýnenda.- fgg