Hamborgarar handa tökuliðinu

Eva Longoria og mótleikarar hennar í sjónvarpsþáttunum Desperate Housewives, þau Tuc Watkins, Kevin Rahm og Vanessa Williams, fengu hamborgarabíl frá fyrirtækinu Fatburgers til að mæta á tökustað þáttanna fyrir skömmu. Tilefnið var síðasti tökudagur nýju þáttaraðarinnar.

Uppátækið féll vel í kramið enda höfðu leikararnir og tökuliðið lagt á sig mikið erfiði til að ljúka við þáttaröðina. Gæddi hópurinn sér á hamborgurunum og öllum kaloríunum sem þeim fylgdu með bros á vör.

Hin 36 ára Longoria er ekki eina stjarnan sem hefur gefið mótleikurum sínum gott að borða á tökustað. Ekki er langt síðan Jessica Biel og Gerard Butler keyptu formkökur handa tökuliðinu þegar þau léku í myndinni Playing the Field í bænum Shreveport í Louisiana-ríki. Leikkonan Katie Holmes var einnig gjafmild við tökur á myndinni Mad Money. Hún keypti alls konar góðgæti handa mótleikurum sínum og tökuliði, þar á meðal smoothie, ís, pitsur og formkökur.