Stíf dagskrá hjá Shia

Shia LaBeouf hefur tekið að sér hlutverk Ig Perrish í kvikmyndinni Horns, sem er byggð á samnefndri skáldsögu eftir Joe Hill. Myndin fjallar um mann sem vaknar og uppgötvar að horn eru byrjuð að vaxa úr höfði hans. „Shia er afar hæfileikaríkur leikari og hann var frá upphafi mjög spenntur fyrir þessari sögu,“ sagði Cathy Schulman hjá framleiðandanum Mandalay Pictures. Shia, sem nýlega hætti með bresku leikkonunni Carey Mulligan, er með fleiri verkefni í bígerð. Þriðja Transformers-myndin er væntanleg ásamt mynd sem nefnist The Wettest County in the World.