Synda Guðlaugssund í Köben

„Þetta leggst mjög vel í mig,“ segir Eyjamaðurinn Magnús Berg Magnússon. Hann og nokkrir félagar hans sem eru búsettir í Kaupmannahöfn ætla í dag að minnast afreksins þegar Guðlaugur Friðþjófsson synti sex kílómetra í land eftir að Hellisey fórst skammt undan Vestmannaeyjum.

Þeir synda í 25 metra sundlaug í Frederiksberg í Kaupmannahöfn og átti sundið að hefjast klukkan sjö í morgun að staðartíma. Ferðirnar verða 240 ætli þeir að synda kílómetrana sex. „Það er mjög auðvelt að koma sér í gírinn þegar maður hugsar út í að maðurinn synti þetta í ísköldum sjónum um hávetur. Þetta er lítið mál þegar maður er kominn af stað,“ segir hinn 24 ára Magnús Berg sem stundar mastersnám í fjármálum.

Hann hefur einu sinni áður synt til heiðurs Guðlaugi í Kaupmannahöfn. Einnig hefur hann synt í Eyjum þar sem afreksins hefur verið minnst á hverju ári síðan 1985 í Sundhöll Vestmannaeyja og hefur Friðrik Ásmundsson, fyrrverandi skólastjóri Stýrimannaskólans, haldið utan um það.

Aðspurður hvort það sé ekki erfitt að líkja eftir afreki Guðlaugs segir Magnús að það sé ómögulegt. „Það er ekki hægt að líkja eftir þessu afreki eða aðstæðunum sem Guðlaugur þurfti að ganga í gegnum.“ - fb