Endurgerir sígild íslensk jakkaföt

Hönnunarfyrirtækið Andersen & Lauth hefur ákveðið að endurgera gömul jakkaföt frá klæðskeraverkstæðinu A&L sem starfrækt var frá árunum 1908 til 1975.

„Okkur langar að athuga hvort ekki leynist enn fágæt eintök af Andersen & Lauth jakkafötum í fataskápum landsmanna. Það sem við viljum gera er að endurgera jakkafötin í sem nákvæmastri mynd og taka inn eins og tvenn slík jakkaföt í hverri línu. Við viljum fá að skoða jakkafötin, mynda þau og mæla svo hægt sé að sauma eftir þeim,“ útskýrir Gunnar Hilmarsson, annar eigenda Andersen & Lauth. Hann segir mikinn fjölda karlmanna hafa keypt sér jakkaföt frá fyrirtækinu á sínum tíma og því sé hann vongóður um að finna nokkur slík. „Pabbi minn lét til að mynda sérsauma á sig jakkaföt hjá A&L fyrir skírnina mína og notaði þau svo næstu tuttugu árin,“ segir Gunnar.

„Það er mikil saga sem fylgir þessu nafni og margir eldri herramenn fá stjörnur í augun þegar minnst er á klæðskeraverkstæðið,“ segir Gunnar að lokum. Þeim sem luma á gömlum jakkafötum frá fyrirtækinu er bent á að hafa samband við skrifstofu Andersen & Lauth í síma 578-1778.- sm