Kann betur við mig í uppvaskinu

Þúsundþjalasmiðurinn Friðrik Weisshappel víkkar út veldi sitt á morgun með opnun nýs Laundromat Café í Austurstræti. Fyrir rekur Friðrik tvö samnefnd kaffihús í Kaupmannahöfn við góðar undirtektir og segir nýjustu viðbótina fylgja sömu stefnu.

„Hugmyndin er að vera með kaffihús sem kappkostar við að bjóða upp á góða þjónustu, meiri þjónustu en fólk á að venjast; hraðari nettengingu, fleiri tímarit, þvottavélar og stórt barnasvæði,“ segir hann með ríkri áherslu, en líkt og fyrirmyndin er nýja kaffihúsið hannað með þarfir fjölskyldna í huga.

Þannig liggja tvö handrið eftir stiganum á neðri hæðina, annað fyrir fullorðna en hitt, sem er lægra, er ætlað börnum. Þar tekur við fjölskylduvænt rými, búið hægindastólum fyrir fullorðna og börn, og leiksvæði þar sem boðið verður upp á sérstakar sögustundir um helgar.

Matseðillinn er líka sniðinn að þörfum allrar fjölskyldunnar. „Hann er ansi fjölbreyttur, allt frekar einfalt og vel úti látið,“ segir Friðrik, kampakátur með afraksturinn.

En verða einhverjar nýjungar, séríslenskar kannski, á honum?

„Já, til dæmis lambahryggur á sunnudögum,“ svarar hann og bætir við að sjálfur komi hann þó ekki nálægt matseldinni. „Ég get vel eldað og geri það gjarnan heima en kann betur við mig í uppvaskinu og finnst það besta starfið í húsinu.“

Frá því að Friðrik áformaði opnun kaffihúss í Reykjavík hefur hann verið með annan fótinn á landinu. Hann hefur þó ekki í hyggju að fjölga hér frekar kaffihúsum eða flytja heim í bráð enda hamingjusamlega kvæntur tveggja barna faðir í Kaupmannahöfn.

En hræðist hann ekki tilhugsunina að reka kaffihús í öðru landi?

„Nei, enda verður staðurinn dagsdaglega rekinn af öðrum. Það mun ganga vel enda er ég umkringdur úrvals samstarfsfólki sem ég treysti hundrað prósent,“ segir hann og brosir.

roald@frettabladid.is