Ísdrottningin í viðræðum við Playboy í Þýskalandi

„Þetta er alveg svakalegt tækifæri. Þetta er eitt stærsta blaðið í Þýskalandi og eitt stærsta Playboy-blað heims," segir fyrirsætan og athafnakonan Ásdís Rán Gunnarsdóttir.

Playboy í Þýskalandi hafði nýlega samband við Ásdísi Rán um mögulega myndatöku fyrir blaðið. Sérútgáfur af Playboy eru gefnar út í 30 löndum utan Bandaríkjanna. Af þeim er þýska útgáfan sú elsta og hefur komið út óslitið frá árinu 1972. Blaðið er gefið út í rúmlega 250 þúsund eintökum og er með um milljón lesendur í hverjum mánuði, samkvæmt útgefandanum Hubert Burda Media.

Ásdís sat fyrir á forsíðu Playboy í Búlgaríu í fyrra og ætlar að taka sinn tíma í að íhuga tilboð þýska blaðsins. „Ég er ekki búin að ákveða neitt," segir hún ákveðin.

„Það tók mjög langan tíma síðast að ná mínu fram og ákveða hvað ég vildi gera, þannig að þetta er ferli sem ég þarf að fara í gegnum. Ég er ekki að fara að segja „já" á morgun og hlaupa í myndatöku. Það þarf að fara eftir mínum reglum þannig að ég verði ánægð og þeir verði ánægðir."

Ásdís er raunsæ þegar hún er spurð hvort forsíðan sé í boði í Þýskalandi eins og í Búlgaríu. „Það kemur ekki í ljós strax. Lokaákvarðanir eru teknar eftir myndatökuna," segir hún.

„Ég er náttúrlega ekki stórstjarna í Þýskalandi – ég er í rauninni óþekkt hérna. Í Búlgaríu gat ég sagt að ég færi ekki í myndatöku nema ég fengi forsíðuna, hér get ekki sagt það. Þó að ég myndi bara sitja fyrir á undirfötum í litlum myndaþætti inni í blaðinu yrði ég sátt."

Eins og venjulega er Ásdís Rán með mörg járn í eldinum. Hún á einnig í viðræðum við undirfatamerki í Evrópu um að vera andlit fyrirtækisins. Hún vill þó ekki gefa upp nafn fyrirtækisins fyrr en skrifað hefur verið undir samninga. Þá vinnur hún að sumarförðunarlínu Icequeen-merkis síns og hyggst bæta kjólum inn í línuna, sem hefur hingað til einskorðast við förðunarvörur.

atlifannar@frettabladid.is