Byssumaður handtekinn - hótaði lögreglumönnum

Lögreglunni á Selfossi bárust seint í gærkvöldi tilkynningar um að skothvellir heyrðust frá húsi á Stokkseyri.

Í framhaldi af því var húsráðandi þar, sem var ölvaður, handtekinn og er nú í vörslu lögreglu. Við handtökuna hafði hann í hótunum við lögreglumenn á vettvangi en beindi ekki skotvopnum að þeim.

Hann hefur játað að hafa hleypt af byssunni við hús sitt. Málið er til rannsóknar hjá Lögreglunni á Selfossi og nýtur hún aðstoðar sérfræðinga frá tæknideild Lögreglu Höfuðborgarsvæðisins og Sérsveitar Ríkislögreglustjóra.

Krafist verður gæsluvarðhalds yfir manninum.