Gaman að hestarnir séu komnir inn í stórmynd

„Við þekkjum þessa eiginleika mjög vel og þetta er bara mjög gaman að hestarnir skuli vera komnir inn í svona mikla stórmynd," segir Einar Bollason, einn helsti ferðaþjónustufrömuður á Íslandi á sviði hestamennsku. Fréttablaðið greindi frá því í morgun að íslenskir hestar yrðu notaðir við tökur á Hobbitanum, sem er undanfari sögunnar um Hringadróttinssögu.

Einar sagði í samtali við Reykjavík síðdegis á Bylgjunni í dag að hann vonaðist til þess að hestarnir ættu eftir að koma víða við. „Því þetta er náttúrlega einstakt fyrirbæri - þessi íslenski hestur," segir Einar. Hann telur að hestarnir sem notaðir verða við kvikmyndina séu aðallega fluttir héðan frá Íslandi eða frá Þýskalandi.