Forsætisráðherra haldi ró sinni

Samtök atvinnulífsins telja brýnt að Jóhanna Sigurðardóttir, forsætisráðherra, haldi ró sinni. Hún hafi ráðist með fordæmalausum hætti á samtökin og eitt aðildarfélag þess, Landssamband íslenskra útvegsmanna, á flokksstjórnarfundi Samfylkingarinnar í dag. LÍÚ gagnrýnir rangfærslur í máli Jóhönnu.

Jóhanna sagði engan vilja bera ábyrgð á því að völdin fari í hendurnar á íhaldsöflunum, þar sem sérhagsmunir forréttindastéttanna taki aftur völdin. Á liðnum dögum hafi þjóðin verið minnt íllþyrmilega á tilvist þessara hagsmunagæsluafla, bæði með gíslatöku LÍÚ á kjarasamningum og andstöðunni við stjórnlagaþingið. Sem snúist aðeins um eitt, baráttuna um auðlindir þjóðarinnar. „Auðlindirnar sem þeir vilja áfram eiga og nýta fyrir sig sjálfa, en við jafnaðarmenn viljum að þjóðin eigi og nýti."

Jóhanna sagði það eins eins ljóst í hennar huga, eins og dagur rís að morgni, að aðeins meirihlutastjórn jafnaðarmanna mun tryggja að nýtt og sanngjarnara stjórnkerfi fiskveiða verði að veruleika og að skýrt verði í stjórnarskrá að auðlindirnar séu sameign allra landsmanna og arðurinn af auðlindunum renni til þjóðarinnar.

Vegna ræðu Jóhönnu hafa nú bæði SA og LÍÚ sent frá sér yfirlýsingar. „Árásir forsætisráðherra á Landssamband íslenskra útvegsmanna eiga sér engar málefnalegar forsendur. Sjávarútvegsfyrirtæki hafa starfað eftir lögum um stjórn fiskveiða sem voru mótuð í tíð ríkisstjórna sem forsætisráðherra sat í og ber því mikla ábyrgð á," segir í tilkynningu sem Vilhjálmur Egilsson, framvæmdastjóri SA, sendi fjölmiðlum í dag.

Þar segir að löggjöfin um stjórn fiskveiða hafi löngum verið deiluefni. „En endurskoðunarnefnd á vegum núverandi ríkisstjórnar náði víðtæku samkomulagi um grundvallarbreytingu á stjórnkerfinu með aðild stjórnarflokkanna, tveggja stærstu stjórnarandstöðuflokkanna og allra helstu hagsmunasamtaka sjávarútvegsins bæði fyrirtækja og starfsfólks."

Í yfirlýsingu LÍÚ segir meðal annars að samtökin hafi aldrei efast um forræði íslenska ríkisins á fiskveiðiauðlindinni og rétt ríkisins til að setja reglur um stjórn fiskveiða á grundvelli fullveldisréttar þess.

„Samningar um tímabundin afnot útgerða af aflahlutdeild gegn gjaldi, undirstrikar þetta forræði. Á sama hátt eiga íslenskar útgerðir stjórnarskrárvarinn rétt til afnota að aflahlutdeild sinni."