Íslendingar í stórmyndinni Faust

Stórmyndin Faust í leikstjórn Alexander Sokurov verður frumsýnd í kvöld. Myndin var að hluta til tekin upp á Íslandi og skartar íslenskum leikurum í aukahlutverkum.

Leikaranum Sigurði Skúlasyni bregður fyrir á tveimur stöðum í stiklu rússnesku stórmyndarinnar Faust. Eins og komið hefur fram í Fréttablaðinu fer Sigurður með aukahlutverk í myndinni sem var að litlu leyti tekin upp hér á landi fyrir tveimur árum.

Hann lék í tveimur atriðum í Faust og er ánægður með að hafa ekki verið klipptur út. „Maður veit aldrei þegar maður er að leika í einum eða tveimur senum í myndum. Stundum er maður klipptur út en mér sýnist ég vera þarna inni," segir Sigurður, sem skemmti sér vel við tökurnar.

„Það var gaman að lenda í þessu ævintýri að taka þátt í mynd af þessari stærðargráðu og með þessum leikstjóra sem mér finnst ótrúlega góður," segir hann og á við Alexander Sokurov, einn virtasta leikstjóra Rússa.

„Hann er einn sérstæðasti og besti kvikmyndaleikstjóri sem ég hef starfað með." Gerð Faust tók þrjú ár, þar af fóru tvö í eftirvinnslu sem er óvenjulega langur tími. „Hann mótar sínar myndir alveg frá a til ö. Þetta er hans sköpunarverk að öllu leyti," segir Sigurður um leikstjórann.

Framleiðslukostnaður Faust nam hundruðum milljóna króna. Þar af var sjötíu milljónum eytt hér á landi vegna kvikmyndatakanna sem voru unnar í samstarfi við Saga Film. Myndin verður frumsýnd á kvikmyndahátíðinni í Feneyjum í kvöld og hún verður einnig sýnd á Alþjóðlegri kvikmyndahátíð í Reykjavík, Riff. Sigurði var ekki boðið á frumsýninguna í Feneyjum en hann ætlar á sýninguna hér á landi. Forsvarsmenn Riff hafa reynt að fá Sokurov til Íslands en óvíst er hvort hann þekkist boðið. Leikstjórinn fékk heiðursverðlaun hátíðarinnar árið 2006.

Auk Sigurðar koma Svandís Dóra Einarsdóttir og Hilmar Guðjónsson við sögu í myndinni í litlum hlutverkum og einnig leika þeir Hjörtur Jóhann Jónsson og Ævar Þór Benediktsson hermenn. Hilmar Guðjónsson, sem leikur annað aðalhlutverkanna í Á annan veg sem var frumsýnd um síðustu helgi, segist ekkert vita hvort hann hafi verið klipptur út úr Faust eður ei.

„Ég lék Kaín úr Biblíunni. Hann drepur bróður sinn og þarf að éta sjálfan sig," segir Hilmar. „Það var smíðaður á mig gervifótur þar sem sást inn í bein við hnéð. Þar át ég parmaskinku og sultu íklæddur gæru í vetrarkulda úti í hrauni. Það var eina atriðið mitt."

Svandís Dóra lék Medeu í litlu atriði þar sem djöfullinn Mefisto sýnir Faust undirheimana þar sem Medea er stödd. „Hún er eiginlega bara gengin af göflunum. Hún er föst í helvíti og alveg sturluð," segir Svandís Dóra um atriðið. Hún hafði gaman af samstarfinu við Sokurov. „Hann var alveg meiriháttar. Það var þvílík reynsla og upplifun að fá að vinna með svona manni."

freyr@frettabladid.is