Bæjarstjórnin harmar umræðu um Pál

Bæjarstjórn Kópavogs harmar þá umræðu sem hefur átt sér stað í kjölfar ráðningar Páls Magnússonar í starf forstjóra Bankasýslu ríkisins. Páll var sem kunnugt er ráðinn til Bankasýslunnar, en tilkynnti í gær að hann hygðist ekki taka að sér starfið eftir að stjórn Bankasýslunnar sagði af sér.

Páll hefur hingað til gegnt embætti bæjarritara Kópavogs. Hann sagði upp því starfi þegar hann var ráðinn til Bankasýslunnar, en hefur nú dregið þá uppsögn til baka.

Í bókun sem samþykkt var á bæjarstjórnarfundi í gær segir að persóna hans sem og störf hafi verið dregin fram í umræðuna og snúið á versta veg. Bæjarstjórn beri traust til starfsmanns síns og viti að hann muni starfa fyrir bæjarfélagið af heilindum hér eftir sem hingað til.