Glamúrgellur í kvikmyndaleik

Tökur á undirheimakvikmyndinni Svartur á leik eru hafnar. Myndin byggir á samnefndri bók Stefáns Mána um undirheimana í Reykjavík, eiturlyf, handrukkanir og kynlíf.

„Mér líst alveg hrikalega vel á þetta, ég er ekki Evrópumethafi í bjartsýni og yfirlýsingum en það sem ég hef séð, heyrt og veit er alveg geggjað,“ segir rithöfundurinn Stefáni Máni. Það hefur verið löng bið hjá honum að sjá bókina færast upp á hvíta tjaldið og þótt hann sé ekki mikið að þvælast fyrir vinnandi fólki hefur forvitnin dregið hann á tökustað öðru hvoru. „Ég á eftir að kíkja nokkrum sinnum, þetta er náttúrlega þvílíkt teymi sem er að vinna að þessu, handritið er að mínum dómi frábært og settið er alveg fullkomið,“ en myndin gerist árið 1999 og því þarf að huga að hverju einasta smáatriði.

Egill Gillz og Jóhannes Haukur hafa eilítið stolið senunni í undirbúningi myndarinnar, valið á Agli kom mörgum á óvart og Jóhannes Haukur hefur bætt á sig miklum vöðvamassa fyrir hlutverk Tóta dyravarðar. „Það er búið að raka af honum hárið og hann er með vígalegan hökutopp. Mér skilst að hann elski Tóta dyravörð og sé fastur í karakter, gangi um með djöfullegt glott og glampa í augunum.“

Um Egil viðurkennir Stefán að fyrst hafi þetta komið honum á óvart. „Ég hef ekki heyrt neitt nema gott um þennan strák, hann smellpassar inn í þetta, hann er nautsterkur og það geta ekki allir leikið eftir það sem hann er að gera í myndinni.“

freyrgigja@frettabladid.is