Íslenskir spennuþættir á kaupstefnu í Hollywood

„Menn eru auðvitað að hamra járnið á meðan það er heitt," segir Hannes Pálsson hjá framleiðslufyrirtækinu Saga Film.

Fyrirtækið tekur þátt í stórum endurgerðarmarkaði sem fram fer í Hollywood í næstu viku og nefnist The Remakes Market. Þar geta „lítil" fyrirtæki, eins og Saga Film, komið á framfæri verkefnum sínum sem þau telja að eigi erindi við önnur stór lönd.

Saga Film hyggst kynna spennuþáttaraðirnar Svarta engla, sem sýndir voru á RÚV, og Pressu, sem sló í gegn á Stöð 2, og svo kvikmyndina Kalda slóð eftir Björn Brynjúlf Björnsson.

Þessar þreifingar koma í kjölfarið á endurgerð á kvikmyndinni Reykjavik-Rotterdam, Contraband, í Hollywood en hún verður frumsýnd eftir jól. Bandaríski leikstjórinn James Mangold hefur auk þess lýst því yfir að hann vilji endurgera Borgríki eftir Ólaf Jóhannesson og þá stendur til að endurgera Næturvaktina í Noregi. Bandaríski stórleikarinn Jack Black er einnig áhugasamur um íslensku gamanþáttaröðina.

Norrænir spennuþættir og kvikmyndir eru aðalæðið í Bandaríkjunum um þessar mundir. Sjónvarpsþættirnir The Killing, sem er endurgerð á danska þættinum Forbrydelsen, þykja hafa heppnast einstaklega vel og segir Hannes að menn séu að leita að einhverju í þeim dúr, einhverju með ferskri og nýrri nálgun.

„Við erum sjálfir búnir að senda stiklur sem hafa þegar vakið töluverða athygli," segir Hannes og tiltekur þar sérstaklega Pressu.

„Efnistökin þar þykja nokkuð nýstárleg og þetta er heimur sem hefur ekki verið mikið notaður," útskýrir Hannes og bætir því við að þegar hafi verið bókaðir margir fundir með áhugasömum kaupendum.

Sigurjón Kjartansson, sem er aðalmaðurinn á bak við Pressu, segir að hann hafi alltaf séð Pressu sem mjög endurgerðarvæna, alveg síðan þeir gerðu fyrstu seríuna. „Hún á fullt erindi þangað," segir Sigurjón og bætir því við að þetta hafi legið ansi lengi í loftinu.

„Ég vissi nú reyndar ekki af þessari ráðstefnu en það er mjög ánægjulegt að hún sé á leiðinni þarna út," segir Sigurjón en nú er unnið að gerð þriðju seríunnar. „Hún mun fara aðeins meira út í netheima og hvernig þeir mæta dagblaðinu."

freyrgigja@frettabladid.is