Íslendingar halda sig nálægt heimahögum

Íslendingar sækjast helst eftir sumarhúsum nálægt heimili sínu á meðan Svíar, Norðmenn og Danir setja það í fyrsta sæti að hafa sumarhúsin sín við sjóinn. Þetta kemur fram í nýrri samnorrænni könnun meðal fasteignarsala, en 89% þeirra sem svöruðu könnuninni á Íslandi nefndu fjarlægð frá heimili þegar þeir voru inntir um þau sjónarmið sem helst hafi áhrif á eftirspurn eftir sumarhúsum.

Næst mikilvægast þótti umhverfið en 72% nefndu það, 42% tóku fram staðsetningu við vatn og svo sögðu 38% það mikilvægt að stutt sé í þjónustu.

21% sænskra fasteignasala töldu svo gestahús hafa mikil áhrif á kaupáhuga fólks, 10% þeirra dönsku og 1% þeirra norsku, en hjá íslenskum fasteignasölum var hinsvegar enginn sem nefndi þann kost.

Aðspurður hvort þetta sé vísbending þess að Íslendingar séu minnst gestrisnir Norðurlandaþjóðanna segist Grétar Jónasson, framkvæmdastjóri Félags fasteignasala, frekar vilja túlka niðurstöðurnar sem svo að Íslendingar vilji helst njóta nálægðar vina og fjölskyldu sem komi í heimsókn og hafi þar af leiðandi lítinn áhuga á því að senda þau í aðskilin gestahús.