Neysla mælist svipuð og fyrri ár

Niðurstöður evrópsku vímuefnarannsóknarinnar ESPAD 2011 eru að neysla 15 til 16 ára unglinga á hassi og marijúana hér á landi er svipuð og hún var fyrir sextán árum. Árið 1995 höfðu tíu prósent unglinga á þessum aldri prófað kannabisefni en ellefu prósent í ár.

 

Þetta kemur fram í fréttatilkynningu frá Rannsóknasetri forvarna við Háskólann á Akureyri. Þar kemur fram að neysla kannabisefna mældist mest fimmtán prósent árið 1999 en minnst níu prósent árið 2007.

Rannsóknin sýnir að aðgengi þessa aldurshóps að kannabisefnum mælist einnig svipað og fyrir sextán árum. Viðhorf unglinga til skaðsemi efnanna hefur mildast nokkuð og er mikill munur á viðhorfi unglinganna frá því sem var 2007.

 

Í fréttatilkynningu segir að þrátt fyrir umræðu um mikinn vanda fámenns hóps unglinga á undanförnum vikum þá verði að halda því til haga að vímuefnaneysla íslenskra unglinga er með því minnsta sem gerist í Evrópu og „engin merki eru um að faraldur vímuefnaneyslu í þeim aldurshópi."- shá