Forstjóri CCP skammaður

Forsvarsmenn tölvuleikjafyrirtækisins CCP og hinir svokölluðu CSM-leiðtogar EVE Online-tölvuleiksins sendu í gær frá sér sameiginlega yfirlýsingu þar sem atburðir síðustu daga eru harmaðir. Í sérstakri yfirlýsingu CSM-leiðtoganna er tölvupóstur frá framkvæmdastjóra CCP, Hilmari Veigari Péturssyni, fordæmdur – hann hafi verið úr öllum tengslum við EVE Online-samfélagið. „Við skiljum vel þá leikmenn sem fannst pósturinn óviðeigandi og móðgandi."

Eins og Fréttablaðið greindi frá urðu notendur EVE Online-tölvuleikjaheimsins æfir þegar innanhúsbréfi frá CCP var lekið á netið. Þar var viðraður sá möguleiki að setja í sölu hluti sem gætu haft áhrif á gang leiksins. Leikmenn gætu keypt sér tæki og tól sem aðrir leikmenn hefðu eytt ómældum tíma í að byggja upp. Yfir fimm þúsund áskrifendur hótuðu að loka aðgangi sínum að tölvuleiknum en slíkt hefði þýtt tap upp á rúmlega hundrað milljónir íslenskra króna.

CSM-leiðtogarnir og forsvarsmenn CCP funduðu um helgina og samkvæmt fréttatilkynningunni var málið stormur í vatnsglasi. „Þarna blönduðust saman í einum potti örðugleikar í samskiptum, lélegt skipulag og einskær óheppni," segir í tilkynningunni. Jafnframt kemur fram að ekki standi til að setja „mikilvæga" hluti í sölu heldur eigi vefverslunin eingöngu að þjóna hégóma leikmanna.

-fgg