Enginn gervisnjór á Jóla Gó

„Ég lofa að það verður enginn gervisnjór,“ segir Guðmundur Óskar Guðmundsson, bassaleikari og einn skipuleggjenda tónleikanna Jólagestir Gó, eða Jóla Gó, sem haldnir verða í kvöld og annað kvöld á Café Rósenberg.

Einvalalið tónlistarfólks kemur fram á tónleikunum í ár, sem haldnir eru undir þessu nafni annað árið í röð. Þau Sigríður Thorlacius, Sigurður Guðmundsson, Högni Egilsson, Aron Steinn Ásbjarnarson, Sigurlaug Gísladóttir, Dísa Jakobs, Sigtryggur Baldursson og Helgi Björns munu þenja raddböndin og undirleikur verður meðal annars í höndum Hjartar Ingva Jóhannssonar píanóleikara, Ara Braga Kárasonar trompetleikara og Jóels Pálssonar á saxófón.

Guðmundur segir fjögur ár síðan hann hóaði vinum sínum saman til að spila á jólatónleikum á Rósenberg, en í fyrra kviknaði hugmyndin að nafninu. „Nafnið varð til sem einhvers konar grínádeila á alla rjómatertutónleikana sem boðið er upp á aðventunni eins og Frostrósir og Jólagesti Björgvins. En annars eru þetta allt saman góðir vinir mínir og kunningjar, okkur finnst gaman að gera þetta saman og hugmyndin er líka að nota tækifærið þegar fólk kemur heim í jólafrí og þjappa hópnum aðeins saman.“

Guðmundur lofar góðri stemmningu, þótt enginn verði gervisnjórinn, og segir prógrammið blöndu af jólalögum og öðrum lögum tónlistarfólksins. Aðspurður hvort Helgi Björns muni taka sitt ástsæla og umdeilda jólalag, Ef ég nenni, segir Guðmundur það eins gott. „Það kemur náttúrulega ekkert annað til greina. Við misstum kannski 50 mögulega tónleikagesti við þessa staðhæfingu en fengum aðra 500 til að mæta.“

Tónleikarnir hefjast klukkan 21 á Café Rósenberg bæði kvöldin, miðaverð er 2000 krónur og miðasala fer fram við innganginn. -bb