Síminn harmar lögbrot

Í tilkynningu frá Símanum harmar fyrirtækið að hafa nýtt upplýsingar um viðskiptavini annarra fjarskiptafyrirtækja í markaðslegum tilgangi. Fyrirtækið ætli að tryggja að slíkt brot endurtaki sig ekki.

„Síminn hefur viðurkennt að hafa nýtt fjarskiptaumferðarupplýsingar í markaðslegum tilgangi og hefur unnið með eftirlitsstofnunum að því að upplýsa málið frá því það kom upp. Síminn harmar að hafa nýtt fjarskiptaumferðarupplýsingar með þeim hætti sem gert var," segir í tilkynningunni.

Þar segir jafnframt:

„Persónuvernd hefur tilkynnt Símanum að stofnunin hefði í hyggju að kæra fyrirtækið vegna ólögmætrar notkunar samtengiupplýsinga. Um er að ræða sama mál og kom upp síðast liðið vor við bráðabirgðaúrskurð Samkeppniseftirlits og ákvörðun Póst- og fjarskiptastofnunar. Síminn hefur í kjölfar þessa máls farið rækilega yfir alla verkferla innan fyrirtækisins til að tryggja að atvik af þessu tagi endurtaki sig ekki."

Vísir hefur fjallað um úrskurð Persónuverndar í dag en þetta er í fyrsti skipti í sögu Persónuverndar sem stofnunin telur ástæðu til að kæra mál til lögreglunnar. Síminn safnaði upplýsingum um þúsundi viðskiptavina annarra fjarskiptafyrirtækja, meðal annars stórnotenda Nova og voru nöfn þeirra, heimilsföng, starfsheiti og upplýsingar um símtöl geymd í sérstökum gagnagrunni.

Málið komst upp þegar Nova kærði Símann til Samkeppniseftirlitsins og húsleit var gerð í höfuðstöðvum Símans. Póst og fjarskiptastofnun vísaði svo málinu til Persónuverndar sem hefur nú kært Símann til lögreglunnar.