Kastast í kekki milli stjarna í Hollywood

Á meðan allt leikur í lyndi milli Baltasars Kormáks og Marks Wahlberg og þeir tveir farnir að leggja drög að sinni næstu mynd, 2 Guns, hefur heldur betur kastast í kekki milli leikarans og leikstjórans Davids O. Russell.

Vinslitin voru aðalmálið á bandarískum kvikmyndavefmiðlum í gær. Vináttan hangir á bláþræði eftir að Russell ákvað að sniðganga Wahlberg við valið í kvikmyndina The Silver Linings Playbook og fá í staðinn Bradley Cooper. „Hann kostaði minna," hefur vefmiðillinn The Wrap eftir heimildarmanni sínum. Wahlberg dró Russell upp úr miklu drullusvaði þegar hann fékk leikstjórann til liðs við sig í kvikmyndinni The Fighter, Russell hafði þá ekki fengið eitt einasta verkefni eftir kvikmyndina I Heart Huckabees og til að bæta gráu ofan á svart lak myndband á netið þar sem leikstjórinn sást öskra á leikkonuna Lily Tomlin. Skapofsi Russells hefur áður komið honum í bobba því hann hnakkreifst við George Clooney á tökustað Three Kings.

Það þykir ekki gott að verða „óvinur" Wahlbergs um þessar mundir því leikarinn hefur á undanförnum árum komist til mikilla metorða í Hollywood, hann bæði leikur í og framleiðir bíómyndir og hefur þar að auki haslað sér völl í sjónvarpsgeiranum með sjónvarpsþáttaröðinni Entourage. Svo skemmtilega vill til að Russell þessi átti að leikstýra 2 Guns og hafði fengið Vince Vaughn til að leika aðalhlutverkið en Wahlberg og Baltasar hafa nú yfirtekið verkefnið og ætla að skila því til byggða árið 2013. - fgg