Brjálaðist út af þvottinum og sló lögregluþjón

Tæplega þrítugur karlmaður var dæmdur í tveggja mánaða óskilorðsbundið fangelsi í Héraðsdómi Reykjavíkur í dag fyrir að slá lögreglumann hnefahöggi sem ætlaði að rétta honum vatnsglas.

Árásin átti sér stað á bráðageðdeild Landspítalans í ágúst síðastliðnum en þangað var maðurinn færður eftir að hann æsti sig fram úr hófi á sambýli, sem hann bjó á, þegar í ljós kom að þvottur sem hann ætlað að þvo á 30 gráðum, reyndist hafa verið þveginn á 90 gráðum.

Maðurinn er mikill að vexti og gættu fjórir lögreglumenn mannsins á spítalanum þegar atvikið átti sér stað.

Fram kemur í dóminum að maðurinn skilji muninn á réttu og röngu, en það virðist stundum ekki skipta hann máli eins og það er orðað í dóminum. Svo er við þetta bætt: „Því miður hefur hann komist ansi langt með hótana- og ofbeldishneigð sinni."

Maðurinn neitaði sök og hélt því fram að hann hefði slegið undir vatnsglasið en ekki í lögreglumanninn. Allir lögreglumennirnir lýsa hinsvegar atburðarásinni eins, sem er að maðurinn hafi slegið lögreglumanninn þegar hann rétti honum vatnglasið.

Maðurinn hefur margsinnis komist í kast við lögin vegna vímuefnaneyslu sinnar.