Viðvörunarljósið bilaði - Kaupmannahafnarflug frestast

Flugvél Iceland Express á leið til Alicante á Spáni sem lenti vegna bilunar í Manchester í Bretlandi í gærkvöldi, fer frá Manchester til Alicante kl. 12:15 að íslenskum tíma samkvæmt tilkynningu frá ferðaskrifstofunni.

Áætlað er að flugvélin lendi þar kl. 15:00 og verði komin til Keflavíkur um klukkan ellefu í kvöld.

Farþegar á leið til Alicante í gær gistu á hótelum í Manchester eftir að í ljós kom að það myndi taka nokkrar klukkustundir að ljúka viðhaldi á flugvélinni. Hún lenti í Manchester vegna viðvörunarljóss um að eldur kynni að vera laus í einu af farangursrýmum flugvélarinnar. Við skoðun reyndist viðvörunarbúnaðurinn sjálfur vera bilaður og unnu flugvirkjar á vegum félagsins að viðgerð í gærkvöldi og nótt.

Farþegar á leið frá Alicante til Íslands gistu á hótelum á vegum Iceland Express síðast liðna nótt.

Vegna þessa tefst flug Iceland Express til Kaupmannahafnar í dag um um tæpar sjö klukkustundir. Samkvæmt áætlun átti flugvél til Kaupmannahafnar að fara frá Keflavík kl. 08:55 en hún fer klukkan 16:40. Flug frá Kaupmannahöfn til Keflavíkur er hins vegar á áætlun.