Skattbyrðin færst yfir á hátekjufólk

Skattbyrði lágtekjufólks hefur í auknum mæli færst yfir á hátekjufólk í kjölfar breytinga á skattakerfinu. Þetta kemur fram í vefriti fjármálaráðuneytisins. Helmingur hjóna greiðir nú lægra hlutfall af tekjum sínum í tekjuskatt.

Á fyrstu tveimur árum sitjandi ríkisstjórnar voru gerðar miklar breytingar á sköttum, þar á meðal sköttum einstaklinga.

Samkvæmt greiningu fjármálaráðuneytisins nú kemur fram að helmingur hjóna á íslandi, um þrjátíu og eitt þúsund kjón, greiða lægra hlutfall af tekjum sínum í tekjuskatta og útsvar á árinu 2010 en þau gerðu árið 2008.

Með bótum er fjöldi þeirra sem greiða lægra hlutfall enn meiri eða um 37.000. Ennfremur kemur fram að um 77% hjóna eða 47.000 hjón greiða minna í fjármagnstekjuskatt á árinu 2010, en þau hefðu gert skv. 10% flötum skatti.

Þær breytingar hafa verið gerðar á tímabilinu að meðalskatthlutfall fjármagnstekjuskatts hækkaði úr í 10% í 15% af skattstofni.

Áhrif þessara breytinga eru þó afar misjöfn vegna þess hve fjármagnstekjur eru ójafnt dreifðar. Um 1% hjóna hefur 40% allra fjármagnstekna og um 65% fjármagnstekna er hjá 5% hjóna.