Vonast til að skrifa undir samninga í dag

Vonir standa til að hægt verði að skrifað verði undir nýja kjarasamninga á almennum vinnumarkaði í dag. Búið er að semja um öll veigamestu atriðin en verið er að ganga frá smærri málum.

Vonir stóðu til að hægt væri að ganga frá nýjum kjarasamningum í gærkvöldi eða í nótt. Það tókst ekki en fundarhöld hófust aftur í morgunsárið.

„Það er mest verið að vinna í skjalgerð, svo það verði engin mistök á lokametrunum. Við vonumst til að klára þetta í dag,“ sagði Vilhjálmur Egilsson, framkvæmdastjóri Samtaka atvinnulífsins.

Nýju kjarasamningarnir fela það í sér að lægstu laun á almennum vinnumarkaði hækka strax í rúmar hundrað og áttatíu þúsund krónur. Þau eru nú rúmar hundrað og sextíu þúsund krónur. Samningarnir eru til þriggja ára og koma launahækkanir inn í nokkrum skrefum. Að samningstíma loknum verða lágmarkslaun um tvö hundruð og fjögur þúsund krónur. Þegar samningarnir taka gildi fá launamenn fimmtíu þúsund króna eingreiðslu.

Atvinnurekendur segja nýju kjarasamningana dýra fyrir þá.

„Til þess að þetta gangi upp verðum við að fara atvinnuleiðina, sem byggir á að við náum upp fjárfestingum í atvinnulífinu og sköpum störf,“ segir Vilhjálmur.

Bjarni Benediktsson formaður Sjálfstæðisflokksins spurði Jóhönnu Sigurðardóttur forsætisráðherra út í áhrif nýju kjarasamninganna í fyrirspurnartíma á Alþingi í morgun.

Hann sagði mikilvægt að það tækist að skapa hagvöxt svo að launahækkanirnar brynnu ekki upp á báli verðbólgu. Forsætisráðherra fagnaði því að nýjir kjarasamningar væru að nást á almennum vinnumarkaði og sagði spá Hagstofunnar ekki gera ráð fyrir að verðbólga myndi aukast umfram spár um meira en 0,5% með nýjum kjarasamningum.

Jóhanna sagði samningana velta á því að ná hagvextinum upp og að kaupmáttur náist upp auk þess sem lægstu laun hækki enn þá meira.