Vöffludeigið er klárt

Nú styttist í undirskrift kjarasamninga þrátt fyrir að aðilar vinnumarkaðarins sitji enn á fundum og enn sé óljóst hvenær nákvæmlega menn setji penna á blað. Þetta má ráða af því að búið er að hræra vöffludeigið hjá ríkissáttasemjara en það er órjúfanlegur hluti af ferlinu að deiluaðilar gæði sér á vöfflum að undirskrift lokinni.

Elísabet Ólafsdóttir skrifstofustjóri hjá ríkissáttasemjara segir að þessi hefð hafi skapast fyrir hartnær tveimur áratugum. Í eitt skiptið að loknum samningum hjá sáttasemjara hafi verið ákveðið að skella í vöfflur. Þetta fréttist út og þeir sem næstir kláruðu samninga vildu þá fá sama viðurgjörning. „Þetta er orðinn ómissandi hluti við að ganga frá kjarasamningum." segir Elísabet.

Hún segir mjög strangar reglur gilda um að það megi alls ekki byrja að borða vöfflurnar fyrr en eftir að skrifað er undir. Það boði ógæfu að borða þær of snemma.