Tómas býður Yoko

„Yoko verður í bænum. Hún er velkomin ef hún vill koma,“ segir Tómas Tómasson, Stuðmaður og tónlistarstjóri Ob-La-Dí Ob-La-Da. Tónleikar verða haldnir á skemmtistaðnum kl. 22 á laugardaginn í tilefni 71 árs afmælis Bítilsins Johns Lennons. Yoko Ono er einmitt væntanleg til landsins, enda spilar hún í næstu viku á tónlistarhátíðinni Iceland Airwaves með hljómsveitinni The Plastic Ono Band.

Hópur tónlistarmanna stígur á svið á Ob-La-Dí, eða Gunnar Þórðarson, Andrea Gylfadóttir, Þórður Árnason, Björgvin Ploder, Bítladrengirnir blíðu, Helga Völundardóttir, Kormákur Bragason og Gísli Helgason sem spilar lag sitt Lennon á blokkflautu.