Leitar út fyrir landssteinana

Sonja Bent var í hópi þeirra íslensku hönnuða sem sóttu sölusýninguna CPH Vision sem fór fram í Kaupmannahöfn í síðustu viku. Sonja segir sýningar sem þessa geta skapað góð tækifæri fyrir íslenska hönnuði.

Þetta er í annað sinn sem Sonja tekur þátt í sölusýningunni sem haldin er í tengslum við tískuvikuna í Kaupmannahöfn. Hana sækja kaupendur sem koma víða að til að skoða hvað Norrænir hönnuðir hafa upp á að bjóða. Hönnun Sonju vakti nokkra athygli og hefur pöntunum rignt inn eftir sýninguna. „Ég fékk enga eiginlega pöntun á sýningunni sjálfri en þegar ég kom aftur heim var innhólfið mitt fullt af pöntunum," segir Sonja. Hún sótti einnig tískuvikuna í París sem fram fór í janúar og gerði tvo kaupsamninga þar.

Á meðal þeirra sem sýndu hönnun Sonju áhuga var franska tískuverslunin Collette sem selur hönnun á borð við Gareth Pugh, Fendi, Rodarte og Valentino. „Þeir sögðust hafa verið að fylgjast með mér í svolítinn tíma, fengu hjá mér bæklinga og sögðust ætla að hafa samband þegar þeir höfðu farið yfir málin. Það að Collette hafi sýnt mér áhuga er mikið hrós í sjálfu sér, alveg óháð því hvernig málið fer," segir Sonja glaðlega.

Sonja segir nauðsynlegt fyrir íslenska hönnuði að selja vörur sínar úr landi þar sem markaðurinn hér þykir of lítill til að hægt sé að lifa á hönnun. „Það gengur ekki að selja bara hér heima ætli maður sér að lifa á þessu. Vilji maður stækka og halda áfram að draga andann verður maður að leita út fyrir landssteinana. Maður getur lifað nokkur lengi á einni góðri pöntun, sérstaklega þegar gengið er svona gott," segir hún að lokum. -sm