Listfræðinemar stofna gallerí

„Okkur hefur verið tekið opnum örmum," segir Viktoría Jóhannsdóttir Hjördísardóttir, listfræðinemi og einn stofnenda hins glænýja Artíma gallerís.

Listfræðinemar við Háskóla Íslands tóku sig til á haustmánuðum og opnuðu nýtt gallerí, sem þeir sjá sjálfir alfarið um að reka.

„Listfræðin er tiltölulega nýtt nám hjá HÍ og það hefur í raun vantað verklegt nám inn í námið frá upphafi. Þessi hugmynd hefur verið til lengi en alltaf bara á því stigi. Í haust var svo bara rétta fólkið á rétta staðnum og við ákváðum að kýla á að opna gallerí."

Rekstur gallerísins er þannig upp byggður að listfræðinemarnir fá að spreyta sig á sýningarstjórn og öllu því sem tengist uppsetningu á listasýningu og fá í leiðinni dýrmæta reynslu sem nýtist þeim í áframhaldandi námi og starfi. Nemendur Listaháskóla Íslands eru meðal þeirra sem hafa sýnt verk sín í salnum, en mikil vöntun hefur verið á sýningarrými fyrir ungt listafólk.

Viktoría segir viðtökurnar hafa verið framar björtustu vonum. „Það var mikil þörf fyrir þetta, við fundum það um leið og fórum að ræða hugmyndina við fólk í myndlistargeiranum. Það sýnir sig líka í því að við erum búin að bóka sýningar fram í maí á næsta ári og mikill fjöldi fólks hefur sýnt þessu áhuga og mætt á þessar tvær sýningar sem við höfum verið með."

Næsta sýning Artíma gallerís verður opnuð á föstudaginn kl. 17 og hvetur Viktoría allt listaáhugafólk til að leggja leið sína að Smiðjustíg 10 þar sem salurinn er til húsa. -bb