Ferðaþjónustuaðilar í Mýrdal horfa upp á hundruða milljóna tjón

Ferðaþjónustuaðilar á Suðurlandi segja að lokun þjóðvegarins hafi nú þegar spurst út erlendis og valdi afbókunum fram í tímann. Þeir undrast á seinagangi vegagerðarinnar.

Eggert Sólberg Jónsson forstöðumaður Kötluseturs í Vík í Mýrdal segir þjóðveg eitt vera lífæð ferðaþjónustunnar í Mýrdalnum. „Við undrumst seinagang Vegagerðarinnar, það eru verktakar sem að treysta sér til að koma á vegasamgöngum yfir Múlakvísl á tveimur sólarhringum og það er það sem við viljum sjá gert."

Um er að ræða verktaka á Suðurlandi sem hafa lýst þessu yfir við sveitafélög og Vegagerðina að hægt sé að reisa bráðabirgðabrú á stuttum tíma, viðbrögð við þessu tilboði hafi hins vegar verið lítil. „Það er sú lausn sem að við viljum sjá. við viljum sjá vegasamgöngur komið á yfir Múlakvíslina sem allra allra fyrst, núna fyrir næstu helgi," segir Eggert Sólberg.

Hann segir ferðaþjónustu í Mýrdalnum horfa upp á hundruða milljóna tjón. „Það er búið að vera töluvert mikið um afbókanir og þær afbókanir fram í tímann. Það hefur nú þegar spurst út erlendist að þjóðvegurinn verði lokaður í tvær til þrjár vikur og það er mjög slæmt að það hafi spurst út."

Þá segir Eggert Sólberg selflutninga yfir Múlakvísl góðra gjalda verða en þeir komi hins vegar ekki í stað fyrir almennilegar vegasamgöngur. „Þar til þær komast á er þetta í góðu lagi en verkið mætti ganga hraðar fyrir sig."