Neyðarkall frá ferðaþjónustunni í Skaftárhreppi

Ferðaþjónustuaðilar í Skaftárhreppi hafa sent Ögmundi Jónssyni innanríkisráðherra bréf þar sem þeir lýsa yfir miklum áhyggjum af rofi á þjóðvegi 1 við Múlakvísl. Bréfið ber yfirskriftina Neyðarkall frá ferðaþjónustuaðilum í Skaftárhreppi.

Í bréfinu segir: „Við höfum miklar áhyggjur af lokun þjóðvegar nr.1 við Múlakvísl. Þetta rof á þjóðveginum, hringvegi um Ísland bitnar á ferðaþjónustu á öllu landinu með ómældum óþægindum fyrir ferðamenn. Á þessum tíma árs er gistirými nær fullbókað á landinu öllu og verður því neyðarástand þegar eðlilegt flæði umferðar um hringveginn rofnar. Einnig höfum við áhyggjur af neyðarflutningum af svæðinu ef til frekari hamfara skildi koma þar sem flóttaleiðir eru illfærar eins og staðan er í dag.

Við förum þess á leit við íslensk yfirvöld að þau beiti sér fyrir því að vinna hefjist án tafar við þær framkvæmdir sem nauðsynlegar eru til þess að koma umferð um svæðið í lag.

Skýlaus krafa okkar er um það að:

Unnið verði allan sólarhringinn að bráðbirgðabrú og að jafnframt verði strax komið með nothæfar lausnir sem nýtast smábílum og neyðarflutningum, sem ekki er hægt að beina inn á fjallvegi.

Vinna hefjist strax við að bæta vegslóða á Fjallabaksleið Nyrðri fyrir stærri bíla, bættar verði aðstæður til að mætast á veginum og að umferð um svæðið verði stýrt til að hámarka flutningsgetu hans og tryggja öryggi vegfarenda.

Jafnframt óskum við eftir því að þegar í stað verði komin á bráðabirgðalausn og komum með eftirfarandi tillögur:

1. Bílar verði ferjaðir yfir Múlakvísl þangað til að bráðabirgðabrú verður opnuð. Fengin verði tæki sem henta til verksins þegar í stað. Svona ferjulausn yrði að vera opin allan sólarhringinn.

2. Fjallabaksleið Nyrðri verði haldið við allan sólarhringinn með heflum sem yrðu staðsettir á svæðinu. Vinna þarf að ræsisgerð og styrkingu eins og kostur er því vegurinn kemur ekki til með að þola þá umferð sem um hann þarf að fara að óbreyttu.

3. Ræsishólkar lagðir í farveg Múlakvíslar til bráðabirgða, ef það mætti verða til að flýta fyrir akfærum vegi.