Vinna við bráðabirgðabrú hefst í dag

Vinna við bráðabirgðabrú yfir Múlakvísl hefst í dag og er Vegagerðin þegar byrjuð að flytja vinnuvélar og efni til brúargerðar. Líkt og kunnugt er eyðilagðist brúin yfir Múlakvísl í hamfaraflóði um helgina og þjóðvegur eitt lokaðist. Ferðaþjónustubændur krefjast þess að yfirvöld sýni þann vilja í verki með því að láta einskis ófreistað að koma á vegasambandi um hringveginn án tafar.

Vegagerðin hefur kallað hátt í tuttugu manns úr leyfum til að hefja störf við brúargerðina. Þórður Tyrfingsson, deildarstjóri hjá Vegagerðinni, sagði á Morgunvaktinni á Rás 2 í morgun að hafist verður handa við a koma upp bráðabirgðabrú strax í dag.

Hægt er að aka hjáleið um Fjallabaksleið nyrðri, en hún er aðeins jeppafær. Þá hefur bannsvæði vegna ferðamanna á Mýrdalsjökli verið minnkað.

Ferðaþjónusta einn af hornsteinum byggðar

„Við lýsum skilningi okkar á því að það taki nokkurn tíma að gera fært yfir ána á nýrri brú, jafnvel þó til bráðabirgða sé, en með þeim stórvirku vinnuvélum sem tiltækar eru, hvetjum við til að unnið verði að því að koma á vegasambandi um hjáleið og að þeim aðilum sem ekki treysa sér til að aka um slíka vegslóð verði veitt aðstoð," segir í tilkynningu frá stjórn Félags ferðaþjónustubænda.

Þar segir að horft sé til ferðaþjónustunnar við endurreisn Íslands og víða sé hún að verða einn af hornsteinum byggðar á landsbyggðinni. „Það er því afdráttarlaus krafa okkar að menn sýni þann vilja í verki með því að láta einskis ófreistað að koma á vegasambandi um hringveginn án tafar, nú þegar í hönd fer hábjargræðistíminn í ferðaþjónustunni. Slíkt er ekki aðeins mikilvægt fyrir þá sem næst búa, heldur ekki síður fyrir orðspor Íslands sem trúverðugs áfangastaðar ferðamann til framtíðar."