Íslensk hljómsveit vekur athygli í Austurríki

Önnur plata íslensku hljómsveitarinnar Groundfloor, …This Is What"s Left of It, var tekin upp í borginni Salzburg í Austurríki. Þar hefur sveitin vakið athygli að undanförnu á sama tíma og hún er nánast óþekkt hér heima.

„Þegar við gáfum út Bones-plötuna [fyrsta plata Groundfloor] reyndum við að kynna hana heima. Hún var ekki mjög útvarpsvæn, var hrá og djössuð, þannig að við gáfumst upp á því,“ segir söngvarinn og gítarleikarinn Ólafur Tómas Guðbjartsson. „Austurríkismenn virtust kveikja á þessu og platan seldist upp mjög fljótlega. Þá fór ég að kíkja til Austurríkis og vinna tónlist þar og við fórum þangað í túr 2009. Það gekk svona glimrandi vel og það þekktu okkur allir.“

Tveir meðlimir Groundfloor eru búsettir í Salzburg: Harpa Þorvaldsdóttir, sem er að læra þar söng, og kontrabassa­leikarinn Haraldur Guðmundsson. Einnig eru í bandinu Þorvaldur Þorvaldsson, Harpa Þorvaldsdóttir og Julia Czerniawska. Hljómsveitin hefur farið í þrjá kynningartúra um Austurríki og einnig var hún aðal­númerið á tónlistar­hátíðinni Mundus í ítölsku borginni Reggio Emilia. Borgarstjórinn hafði keypt plötu Groundfloor á litlu kaffihúsi á Íslandi og heillaðist svo að hann krafðist þess að hún kæmi fram á hátíðinni.

Groundfloor er nýkomin úr kynningarferð um Austurríki og hélt vel heppnaða útgáfutónleika á staðnum Jazzit í Salzburg.

Tvær austurrískar sjónvarpsstöðvar tóku tónleikana upp. Bandið kemur aftur saman seinna í þessum mánuði í Salzburg þar sem það mun spila í vinsælum spjallþætti.- fb