Lekandi hjá 23 einstaklingum

Á fyrstu níu mánuðum ársins greindust 23 ný tilfelli af lekanda, samkvæmt upplýsingum frá sýklafræðideild Landspítala. Þar af eru sextán karlar og sjö konur frá tvítugu til 66 ára.

Þetta er svipaður fjöldi og árið 2010, en þá greindust átján manns með lekanda.

Fólkið sem greindist var ýmist af íslenskum eða erlendum uppruna.

Einkenni lekanda eru misalgeng eftir kyni, um helmingur smitaðra kvenna fær engin einkenni sýkingarinnar, en flestir karlar sem smitast fá einkenni. Lekandi getur valdið ófrjósemi og bakterían getur einnig farið út í blóðið og valdið sýkingum víðar í líkamanum. - shá