„Þeir eru voða tillitsamir og góðir við mig, koma fram við mig eins og drottningu,“ segir Dóra Jóhannsdóttir, leikkona úr förðunarstólnum en hún er eina stúlkan í væntanlegum sjónvarpsþætti Mið Íslands-hópsins.
Tökur standa yfir þessa dagana og fullyrðir Dóra að það sé stanslaust stuð á tökustað. „Þetta eru náttúrulega alveg sjúklega fyndnir og ljúfir strákar. Það þarf sko ekki að draga mig í vinnuna á morgnana og ég vil helst ekki vera í fríi, það er svo gaman,“ segir Dóra og bætir við að hana hafi langað til að vera í þáttunum um leið og hún frétti að þeir væru í bígerð. Hún og Ari Eldjárn eru skólasystkini úr Menntaskólanum í Reykjavík en þeim Bergi Ebba, Dóra DNA og Jóhanni Alfreð var hún að kynnast fyrst núna.
„Um leið og ég frétti að verið væri að skrifa handritið að þessum þáttum fór verkefnið efst á óskalistann. Ég er því mjög glöð að fá að vera með,“ segir Dóra en nóg er að gera hjá henni þessa dagana því hún er nýbyrjuð að sýna aftur leikritið Verði þér að góðu ásamt leihópnum Ég og vinir mínir.
Sambýlismaður hennar og barnsfaðir, leikarinn Jörundur Ragnarsson, er nýkominn úr tökum á Heimsenda og er því vinnuálaginu bróðurlega skipt á heimilinu. „Já, við skiptum þessu á milli okkar en við leikum reyndar saman í leikritinu Gyllti drekinn í Borgarleikhúsinu í nóvember. Þá getum við loksins borið saman bækur okkar.“ -áp
