Slydda og snjóél á Akureyri

Slydda var á Akureyri í nótt og snjóél undir morgun. Ekki hefur þó myndast hálka á götum.

Það er líka grátt yfir að líta í Ísafjarðarbæ eftir éljagang í nótt og er búist við að hálka sé á fjallvegum á Vestfjörðum og Norðausturlandi.

Umferð var sára lítil á þjóðvegum samkvæmt sjálfvirkum teljurum Vegagerðarinnar og sára fá skip eru á sjó, enda þegar orðið hvasst á mörgum miðum og spáð stormi á enn fleiri miðum.

Áfram er spáð éljagangi og köldu veðri fram yfir helgi, en líklega sleppur Suðvesturland við snjókomu, þótt enn hafi gránað í Esjuna í nótt.