Myndar auglýsingu fyrir úrslitaleik Meistaradeildar

Kvikmyndatökumaðurinn Ágúst Jakobsson hefur lokið tökum á auglýsingu fyrir íþróttavöruframleiðandann Nike vegna úrslitaleiks Meistaradeildar Evrópu í fótbolta sem fer fram á Wembley 28. maí. Þar vann hann með leikmönnum Manchester United og Barcelona.

„Ég er staddur á Nou Camp í Barcelona að taka upp Barca-strákana," sagði Ágúst, þegar Fréttablaðið hafði samband við hann í gær. „Ég er að bíða eftir því að þeir klári æfingu. Síðan koma þeir inn í stúdíó til mín og við myndum þá."

Daginn áður var Ágúst staddur á æfingasvæði Manchester United og myndaði stjörnurnar Rooney, Ferdinand, Chicharito, Evra og Park fyrir auglýsinguna, sem fer í sjónvarp og á netið í næstu viku. Þar ögra leikmenn beggja liða hver öðrum á sniðugan hátt.

„Þetta gekk fínt. Þetta var ekki í fyrsta skipti sem ég vinn með Ferdinand en þetta var í fyrsta skipti sem ég vinn með Rooney. Hann hefur aldrei mætt í tökur hjá mér áður," segir Ágúst, sem hefur tekið upp fjölda fótboltaauglýsinga í gegnum árin. „Ég gerði einu sinni auglýsingu með Ronaldo og Rooney átti að vera líka en mætti ekki. Ég held að hann hafi ekkert voðalega gaman af þessu."

Á meðal annarra leikmanna sem Ágúst hefur unnið með á ferli sínum eru Messi, Didier Drogba, Frank Lampard, Fernando Torres, Thierry Henry og Ronaldinho. Einnig hefur hann tekið upp auglýsingar með boxurunum Mike Tyson og Lennox Lewis.

Ágúst mun taka upp aðra auglýsingu í tengslum við úrslitaleik Meistaradeildarinnar. Sú verður gerð fyrir bandarísku sjónvarpsstöðina Fox og er ætlað að kynna næstu leiktíð. Upptökurnar fara fram í kringum Wembley og mun Ágúst mynda undirbúning fyrir leikinn, áhorfendur og svo hugsanlega verðlaunaafhendinguna. Meðan á leiknum stendur mun hann þó sitja upp í stúku og horfa á fótboltaveisluna í blaðamannastúkunni.

Nú þegar leiktíðinni í fótboltanum er að ljúka verður minna að gera hjá Ágústi í boltaauglýsingum í sumar. Til að mynda verður aðeins eitt stórt mót haldið í sumar, eða heimsmeistaramót kvenna. Í tengslum við það tók hann upp tvær auglýsingar fyrr á árinu sem voru teknar upp í íþróttahöllinni í Düsseldorf þar sem þýska kvennalandsiðið var í aðalhlutverki.

freyr@frettabladid.is