Skúrkarnir raða sér upp

Þrátt fyrir að enn sé rúmt ár þangað til 23. myndin um leyniþjónustumanninn James Bond verður frumsýnd eru spekingar og netnirðir farnir að spá í hver fái það bitastæða hlutverk að gera Bond lífið leitt.

23. myndin um James Bond verður gerð. Fyrir ekki svo margt löngu leit allt út fyrir að Bond væri endanlega úr sögunni, kvikmyndaverið MGM var á leið í gjaldþrot og Bond sömuleiðis. En með fjárhagslegri skipulagningu jakkafataklæddra karla tókst að bjarga skipinu og James sömuleiðis og það verður að teljast jákvætt; Bond-mynd er endalaus uppspretta frétta og vangaveltna enda vilja allir vita hver sé næsta Bond-stelpan og hver skúrkurinn.

Vitað er að Daniel Craig verður á sínum stað enda þykir honum hafa tekist vel upp í bæði Casino Royal og Quantum of Solace. Sam Mendes mun leikstýra myndinni og myndin verður hugsuð sem sjálfstætt framhald af þeim svaðilförum sem Bond hefur þurft að klóra sig út úr í síðustu tveimur myndum. Og þá má auðvitað bæta því við að Judi Dench verður M. Og þetta eru allt staðfestar fréttir.

Hins vegar hefur ekkert verið staðfest hvaða leikkonur hreppa þann eftirsóknarverða titil að verða Bond-stúlka. Það má raunar búast við miklu húllumhæi þegar þær skrifa undir þann ráðningarsamning. Netmiðlar eru lítið farnir að velta möguleikum fyrir sér enda vita þeir kannski sem er að það er til lítils. Nýju Bond-stúlkurnar hafa allar verið fremur óþekktar.

Hins vegar grasserar allt í sögusögnum um hvaða karlleikarar komi til greina í hlutverk þrjótsins. Ein lífseigasta sagan er reyndar um leikkonu en á einhverjum tímapunkti fór sú saga hátt að Rachel Weisz myndi leika aðalskúrkinn. Þeirri hugmynd hefur örugglega verið slátrað fljótlega eftir að framleiðendurnir fréttu að Craig og hún væru nýjasta parið í Hollywood. Nýju nöfnin eru svo sem ekkert slor. Óskarsverðlaunahafinn Javier Bardem hefur í marsmánuði verið stöðugt spyrtur við Bond-hlutverkið. Sem er ekkert skrítið. Þeir sem muna eftir frammistöðu hans í No Country for Old Men geta allir kvittað upp á að Bardem myndi sóma sér vel í hlutverki skúrksins.

Annað nafn hefur einnig skotið upp kollinum og sá er vanur að leika þrjóta og illmenni. Nefnilega Ralph Fiennes, sá og hinn sami og leikur Voldemort, seiðkarlinn sem gerir Harry Potter lífið leitt. Einn vefmiðill gekk meira að segja svo langt að greina frá því Ralph væri byrjaður að undirbúa sig undir hlutverkið og að hann ætti að vera „dæmigerður enskur þrjótur“. Bæði Bardem og Fiennes eru nefndir til sögunnar á imdb.com-síðu Bond-myndarinnar.

Þriðji leikarinn til að vera orðaður við hlutverkið er síðan Anthony Hopkins en á blaðamannafundi fyrir skömmu vísaði hann þeirri hugmynd á bug, hann ætlaði ekki að fara að leika í Bond-mynd. Sem er sorglegt því vissulega hefði verið forvitnilegt að sjá Hannibal Lecter eltast við James Bond.