Nafn Torres plokkað í burtu

Liverpool-treyjur með númeri og nafni Fernando Torres hafa undanfarin ár verið þær vinsælustu á meðal fótboltaaðdáenda bæði hér heima og erlendis. Snögg breyting hefur orðið á því eftir að framherjinn gekk til liðs við Chelsea.

Til að bregðast við vistaskiptunum hafa fyrrverandi aðdáendur Torres hérlendis látið fjarlægja nafn hans af Liverpool-treyjum sínum og sett í staðinn nafn nýja framherjans Andy Carroll, sem tók einmitt við númeri Torres. „Margir hringja og vilja losa stafina eða nafnið af og setja Carroll yfir. Við getum ekki tekið stafi af, það er annað fyrirtæki sem gerir það, en við setjum nafnið yfir, það er minnsta málið,“ segir Sigurður Garðarsson, verslunarmaður í Jóa útherja.

Hann segir að margir Púlarar hafi að vonum verið gramir yfir brotthvarfi Torres. „Þetta er aðallega leiðinlegt fyrir þá sem eiga treyjur með honum og voru kannski nýbúnir að kaupa þær,“ segir hann og bætir við að margir láti líka merkja treyjur með nafni hins nýja framherjans í Liverpool, Luis Suarez frá Úrúgvæ.

Aðspurður segir Sigurður að verslunin eigi ekki Liverpool-treyjur með nafni Torres á lager því hún selji ekki fyrir fram merktar treyjur. „En við eigum eitthvað af römmuðum myndum og plakötum með Torres og það er ekki alveg það vinsælasta í dag.“

Torres er þó ekki dauður úr öllum æðum í versluninni því aðdáendur Chelsea hafa verið duglegir að mæta í búðina til að merkja treyjurnar sínar með nafni hans.- fb