Vilja að nýr Landspítali verði forgangsverkefni

Félags atvinnurekenda vill að uppbygging nýs Landspítala Háskólasjúkrahúss verði gert að forgangsverkefni samkvæmt yfirlýsingu sem þeir sendu frá sér í dag. Þar er vitnað í skýrslu norska ráðgjafarfyrirtækisins Hospitalitet, en þar kemur fram að  talið er að nýr spítali muni skila u.þ.b. 2,6 ma.kr. árlegum sparnaði í rekstri.

Stjórn Félags atvinnurekenda telur að uppbyggingu spítalans eigi að líta á sem forgangsmál og hvetur því félagið stjórnvöld og borgaryfirvöld til að tryggja málinu hraðan, farsælan og faglegan framgang.

Síðast en ekki síst bendir félagið á að spítalaverkefnið sé kærkomið fjárfestingarverkefni fyrir atvinnulífið, jafnt byggingarverktaka sem og ýmis konar þjónustuaðila og innflytjendur.  Verkefnið hefði mjög jákvæð áhrif á atvinnustig og á fjárfestingu, sem er í sögulegu lágmarki um þessar mundir.

Hér fyrir neðan má svo lesa tilkynningu stjórnarinnar í heild sinni:

Mikil undirbúningsvinna hefur verið unnin vegna byggingar nýs Landspítala Háskólasjúkrahúss. Samkvæmt öllum gögnum málsins er ljóst að bygging nýs spítala skilar verulegu hagræði í rekstri spítalans. Í skýrslu norska ráðgjafarfyrirtækisins Hospitalitet er talið að nýr spítali muni skila u.þ.b. 2,6 ma.kr. árlegum sparnaði í rekstri.

Áframhaldandi rekstur LSH án umtalsverðra húsnæðisbreytinga hefur mikinn kostnaðarauka í för með sér og er sóun á tækifæri til aukinnar framleiðni í rekstri spítalans. Þá uppfyllir núverandi húsnæði ekki lágmarkskröfur til spítala og stendur í vegi fyrir að hægt sé að nýta nýjustu tækni í tækjabúnaði, þar sem bæði burðarþol og lofthæð er orðin takmarkandi þáttur.

Að auki er bygging nýs spítala nauðsynleg fyrirhyggja til að mæta aukinni þjónustuþörf samfara því sem þjóðin eldist. Á næstu 14 árum – eða til ársins 2025 – mun Íslendingum á aldrinum 60 ára og eldri fjölga um yfir 50% skv. spám Hagstofunnar. Það er sá hópur sem er í mestri þörf fyrir heilbrigðisþjónustu og því verður uppbygging að taka mið af þessu.

Nýr spítali tryggir ennfremur að framboð á hágæða læknisþjónustu eykst og LSH verður þannig ákjósanlegur vinnustaður fyrir hámenntaða Íslendinga, sem annars sjá ekki atvinnutækifæri á Íslandi.

Stjórn Félags atvinnurekenda telur að ofangreind atriði eigi að líta á sem forgangsmál og hvetur stjórnvöld og borgaryfirvöld til að tryggja málinu hraðan, farsælan og faglegan framgang. Í málum sem þessum verður að horfa til langs tíma, á fjárhagsleg rök og á fyrirsjáanlegar breytingar á aldurssamsetningu þjóðarinnar.

Síðast en ekki síst verður að benda á að spítalaverkefnið er kærkomið fjárfestingarverkefni fyrir atvinnulífið, jafnt byggingarverktaka sem og ýmis konar þjónustuaðila og innflytjendur.  Verkefnið hefði mjög jákvæð áhrif á atvinnustig og á fjárfestingu, sem er í sögulegu lágmarki um þessar mundir.