Afhendir forsetahjónunum húsið um miðjan nóvember

„Mig er farið að vanta geymsluhúsnæði,“ segir Jón Hjörleifsson, sem seldi forsetahjónunum húsið sitt að Reykjamel í Mosfellsbæ, en hjónin keyptu húsið á 70 milljónir og staðgreiddu eignina, eins og Pressan.is hefur áður greint frá.

Jón segir í samtali við Vísi að hann muni afhenda hjónunum eignina 15. nóvember næstkomandi, hann sé því í óðaönn að pakka niður og spyr fréttamann: „Veist þú nokkuð um gott geymsluhúsnæði?“

Því miður gat fréttamaður ekki liðsinnt honum þar, og benti honum einfaldlega á geymslur.com.

Forsetaembættið hefur ekkert viljað tjá sig um kaup hjónanna á fasteigninni, sem er í næsta nágrenni við hús Jóns Baldvins Hannibalssonar, fyrrverandi ráðherra og sendiherra. Jóni Baldvini sagðist reyndar lítast vel á nýju nágrannana þegar Vísir ræddi við hann í september.

Pólitískir spekingar hafa velt fasteignakaupunum fyrir sér, þá ekki síst í ljósi þess að forsetakosningar fara fram næsta vor. Því þykjast sumir sjá vísbendingar um að Ólafur Ragnar Grímsson muni ekki bjóða sig fram til forseta á ný.

En á móti kemur hefur Ólafur Ragnar sýnt fram á að hann sé mikið ólíkindatól, og því geti verið varhugavert að lesa of mikið í kaupin.