Bjarni Ben: Við munum draga allar skattahækkanir til baka

Bjarni Benediktsson, formaður Sjálfstæðisflokksins, segir að Sjálfstæðisflokkurinn leggi á það áherslu að allar skattahækkanir ríkisstjórnarinnar verði dregnar til baka, líka auðlegðarskatturinn.

Bjarni segir hann í eðli sínu ósanngjarnan þar sem um hreinan eignarskatt sé að ræða. Ómögulegt sé t.d að láta fólk sem hafi mjög takmarkaðar tekjur, en eigi eignir, greiða slíka skatta.

Sjálfstæðisflokkurinn kynnti tillögur sínar í efnahagsmálum í gær. Bjarni var gestur okkar í Klinkinu í dag, sérstökum viðtalsþætti um efnahags- og þjóðfélagsmál á viðskiptavef Stöðvar 2 og Vísis.

„Við erum á móti eignasköttum. Það er skattur sem er óháður tekjum fólks. Það er sagt að auðlegðarskatturinn sé eitthvað í líkingu við það sem menn ræða nú um í Bretlandi, Frakklandi, Bandaríkjunum og víðar, þar sem hann miðast við eignameira og tekjuhærra fólk, en í þessum löndum eru tekjurnar skattlagðar, ekki eignirnar. Þeir sem eru með miklar fjármagnstekjur (munu) þurfa að greiða tekjuskatt af þeim í stað þess að greiða fjármagnstekjuskatt. Hér hefur ríkisstjórnin kynnt skatt sem fer beint í eignirnar og fólk hefur lent í vandræðum með að afla sér tekna til að standa straum af skattgreiðslunum," sagði Bjarni, en hann nefndi sérstaklega eldra fólk sem hefði lokið sinni starfsævi en ætti fasteignir og þess háttar.

Sjá má bút úr viðtalinu þar sem Bjarni fer sérstaklega yfir skattamálin í myndskeiðinu hér fyrir ofan. Viðtalið við Bjarna í heild sinni í Klinkinu má nálgast hér.thorbjorn@stod2.is