Aftur réttað yfir lögreglumanni vegna kynferðisbrots

Það er óalgengt að dómar fjölskipaðs héraðsdóms séu ómerktir og þeim snúið aftur í hérað eins og raunin varð þegar Hæstiréttur ómerkti sýknudóm yfir lögreglumanni á Norðvesturlandi, sem var ákærður fyrir kynferðisbrot gegn fimmtán ára gamalli stúlku. Slíkt er þó alls ekki einsdæmi.

Aðeins einn dómari starfar í Héraðsdómi Norðurlands vestra, en hann var vanhæfur til þess að dæma í málinu. Því var dómurinn skipaður héraðsdómurum frá héraðsdómi Norðurlands eystra. Eins og venjan er í kynferðisbrotamálum, þá dæmdu þrír dómarar í málinu. Það voru þeir Þorsteinn Davíðsson, sem var dómsformaður, Erlingur Sigtryggsson og Barbara Björnsdóttir settur héraðsdómari.

Lögreglumaðurinn var sýknaður í héraði, og það sem virðist meðal annars hafa haft áhrif á niðurstöðu héraðsdómara var framburður fimmtán ára gamals sonar lögreglumannsins, sem sagðist hafa orðið vitni að samskiptum stúlkunnar og lögreglumannsins inni í þvottahúsi, þar sem atburðurinn átti að hafa átt sér stað í maí á síðasta ári.

Í Hæstarétti er vikið að framburði sonarins. Og er það niðurstaða Hæstaréttar að líkur séu á að niðurstaða héraðsdóms um sönnunargildi munnlegs framburðar fyrir dómi kunni að vera röng svo að einhverju skipti um úrslit málsins.

Þá bendir Hæstiréttur einnig á að héraðsdómur virðist ekki hafa tekið nægilega til greina óbein sönnunargögn í málinu, sem gætu stutt frásögn stúlkunnar, þar með talið frásagnir vitna um andlegt ástand hennar strax í kjölfar ætlaðs brots og sérfræðinga sem haft hafa hana til meðferðar.

Nú er svo komin upp sú staða að aftur þarf að rétta í málinu. Dómari Héraðsdóms Norðurlands vestra er óhæfur sem fyrr og samkvæmt nýlegum lögum þarf að finna nýja dómara til þess að dæma í málinu. Ekki er ljóst hvenær málið verður tekið fyrir í héraði að nýju, en úrskurður Hæstaréttar birtist í gær.