Stofnun Palestínuríkis ef til vill ekki tímabær

„Ég vonast til þess a nefndin gefi sér góðan tíma til að vinna í þessu þingmáli,“ segir Bjarni Benediktsson, formaður Sjálfstæðisflokksins og fulltrúi í utanríkismálanefnd Alþingis. Nefndin ræddi í morgun þingsályktunartillögu utanríkisráðherra þess efnis að Ísland viðurkenni Palestínu sem sjálfstætt ríki. Bjarni segir ekki tímabært að spá fyrir um hver afdrif málsins verða. Það sé þó enginn ágreiningur um það að stefna beri að stofnun palestínsks ríkis. „Fyrir mér hefur spurningin verið sú hvort að það væri skynsamlegt og tímabært við núverandi aðstæður,“ segir Bjarni.

Það eru nokkur atriði sem þarf að horfa til í því sambandi. Staða flóttamála á þessu svæði er sérstakt áhyggjuefni, nú þegar það liggur fyrir að hartnær helmingur sem mun búa í þessu nýja ríki verða ekki ríkisborgarar. Þetta er eitt vandamál af mörgum sem maður hefði viljað sjá þessa tvo aðila, sem hafa átt í þessum viðræðum lengi, finna lausn á með stuðningi frá alþjóðasamfélaginu.

Annað atriðið sé það hvort raunhæft sé að miða við landamæri frá 1967. „Ísraelsmenn hafa ítrekað lýst því yfir að það sé óraunhæft að þeir geti varið þjóð sína miðað við þau landamæri,“ segir Bjarni. Jafnframt verði að hafa í huga að þegar rætt sé um sjálfstætt ríki Palestínu og átökin sem hafa verið fyrir botni Miðjarðarhafs undanfarna áratugi verði að taka það með í reikninginn að átökin hafi fyrst og fremst snúist um tilverurétt Ísraelsríkis. Átökin hafi ekki snúist um það hvort stofna ætti ríki Palestínu. Það hefur verið tregða arabaþjóðanna allt um kring og á þessu svæði til þess að viðurkenna tilverurétt Ísraelsríkis sem hefur valdið hvað mestri spennu,“ segir Bjarni. 

Bjarni segir að öll þessi atriði verði að taka með í umræðuna. „Ég kalla bara eftir málefnalegri og yfirvegaðri umræðu um þetta viðkvæma mál,“ segir Bjarni.