Skýrslur teknar af sakborningum í dag

"Ég hef aldrei talið vísvitandi rangt fram til skatts," sagði Tryggvi Jónsson, fyrrverandi forstjóri Baugs, við aðalmeðferð skattahluta Baugsmálsins sem fram fer í Héraðsdómi Reykjavíkur í dag.

"Hafi verið ljóst að rangfærslur hafi verið gerðar þá hef ég óskað eftir leiðréttingu á því," sagði Tryggvi. Við skýrslutökur í morgun var Tryggvi spurður út í launagreiðslur sem hann fékk á árinu 1998 og skattaskil af þeim launagreiðslum. Svo virðist vera sem ágreiningur sé á um hvort hann hafi þegið greiðslurnar af Baugi, sem var stofnað um mitt árið 1998, eða Bónus.

Einnig voru teknar skýrslur af Jóni Ásgeiri Jóhannessyni fyrir dómnum í morgun, en Tryggvi og Jón eru ákærðir í málinu auk Kristínar Jóhannesdóttur, systur Jóns Ásgeirs,

Gert er ráð fyrir að skýrslutökur yfir sakborningum haldi áfram í dag og á morgun verða svo teknar skýrslur af vitnum. Þeirra á meðal er Stefán Hilmarsson, sem gegndi stöðu fjármálastjóra Baugs.