Meint brot ná allt til ársins 1998

Skýrslutökum yfir Tryggva Jónssyni, fyrrverandi forstjóra Baugs, í Héraðsdómi Reykjavíkur er lokið. Tryggvi er einn þriggja einstaklinga sem ákærður í er skattahluta Baugsmálsins, en aðalmeðferð í málinu fer fram í dag.

Brotin, sem Helgi Magnús Gunnarsson saksóknari telur að hafi átt sér stað í rekstri Baugs ná allt til ársins 1998. Tryggvi var meðal annars spurður út í bílahlunnindi starfsmanna Baugs, líftryggingar og sjúkratryggingar sem saksóknari telur að hafi ekki verið gert grein fyrir hjá skattayfivöldum með réttum hætti. Þá var hann einnig spurður út í kaupréttargreiðslur á árinu 1999.

Tryggvi var einnig spurður út i kaupréttargreiðslur til Jóns Björnssonar, æskuvinar Jóns Ásgeirs Jóhannessonar, á árinu 2002 en Tryggvi sagðist ekki hafa komið að þeim greiðslum og ekkert vitað af þeim. Jón Björnsson var um tíma forstjóri Haga og framkvæmdastjóri Magazine du Nord.

Laust fyrir klukkan tvö í dag hóf Helgi Magnús saksóknari svo að taka skýrslu af Kristínu Jóhannesdóttur, systur Jóns Ásgeirs Jóhannessonar og meðeiganda í eignarhaldsfélaginu Gaumi. Auk Tryggva og Kristínar er Jón Ásgeir Jóhannesson ákærður í málinu. Hann yfirgaf réttarsalinn strax eftir að skýrslutökum yfir honum lauk.