Fjölskyldur flúið Garð vegna viðvarandi eineltis

Að mati skólanefndar Gerðaskóla í Garði eru eineltismál og líðan nemenda með öllu óviðunandi þar sem 13,3 % nemenda skólans segjast verða fyrir einelti oftar en 2-3 sinnum í mánuði. Þetta er niðurstaða Sjálfsmatsskýrslu 2010 - 2011 og var lögð fyrir skólanefndina 28. september síðastliðinn.

Þar kemur fram að Þetta sé næstum helmingi hærri tala en á landsvísu og alls ekki hægt að sættast á þessa niðurstöðu.

Svo segir orðrétt í bókun Sjálfstæðisflokksins „að Það er svo samfélaginu til vansa að nokkrar fjölskyldur hafa flutt burt undanfarið með börn sín til að forða þeim frá áralöngu einelti og í samtölum sínum við bæjaryfirvöld lýst sárum vonbrigðum yfir viðbrögðum og aðkomu skólayfirvalda að þeim vanda sem börn þeirra voru stödd í."

Í fundargerð skólanefndarinna kemur fram að viðbrögð þeirra starfsmanna, sem eiga að taka á þessu vanda, virðast vera fálmkennd í besta lagi, og er bent á það sé ósamræmi í svörum starfsfólks annars vegar og þeirra nemenda sem fyrir einelti verða hinsvegar.

Þannig segir í sjálfsmatsskýrslunni að 90 % starfsfólks telur að tekið sé á eineltismálum og ráðið fram úr þeim, en 35 % nemenda telja að umsjónarkennari geri ekkert til að taka á einelti því sem þeir verða fyrir.

Þá kemur ennfremur fram að 25 % stúlkna og tæp 30 % drengja segjast verða fyrir einelti í kennslustofu þegar kennari er viðstaddur.

Á næsta fundi skólanefndar, sem fram fór 3. október síðastliðinn, bóka kennarar Gerðaskóla mótmæli þar sem segir orðrétt:

„Framlögð umsögn bæjarstjóra og meirihluta skólanefndar er ekki unnin í samráði við alla skólanefnd og er að miklu leyti byggð á huglægu mati og sögusögnum. Fulltrúar kennara telja þessi vinnubrögð einstaklega ómálefnaleg og ófagleg. Svo virðist sem leitast sé við að draga fram sem neikvæðasta mynd af skólastarfinu og orðalag notað sem ýtir undir neikvæða túlkun."

Meirihluti Sjálfstæðisflokksins svara gagnrýninni með bókun þar sem segir:

„Meirihluti skólanefndar hafnar með öllu að svarið sé byggt á huglægumati og sögusögnum, allt sem fram kemur í svari meirihlutans byggir á framkomnum skýrslum og könnunum. Það skal svo áréttað að svar skólanefndar er ekki runnið undan rifjum bæjarstjóra."