Exeter-dómari upplýsti um stöðu sína en taldi önnur tengsl léttvægari

Einar Ingimundarson, settur héraðsdómari í Exeter-málinu, vissi að samstarfsmaður hans hjá Íslenskum verðbréfum hefði verið vitni á rannsóknarstigi í málinu þegar hann tók að sér að dæma í því. Hann lét dómsformanninn, Arngrím Ísberg vita af stöðu sinni.

Eins og fréttastofa greindi frá á fimmtudag er Einar, sem er héraðsdómslögmaður og einn þriggja dómara í Exeter-málinu, lögmaður hjá Íslenskum verðbréfum sem eru í eigu Byrs hf. Hann ásamt Arngrími Ísberg sýknaði sakborninga í málinu af umboðssvikum en einn dómari, Ragnheiður Harðardóttir, skilaði sératkvæði og vildi sakfella tvo sakborninga.

Tengsl Einars við Byr eru ekki aðeins þau að hann vinni hjá Íslenskum verðbréfum, því einn af starfsmönnum Íslenskra verðbréfa er Atli Örn Jónsson, vitni í Exeter-málinu, en hann var náinn samstarfsmaður Ragnars Z. Guðjónssonar, fyrrverandi sparisjóðsstjóra Byrs og eins af sakborningunum í málinu og áttu þeir m.a saman félagið Húnahorn en viðskipti með hlutabréf í eigu þess voru hluti af sakarefninu.

„Ég vakti athygli Arngríms á að ég væri starfsmaður Íslenskra verðbréfa"

Í g-lið 6. gr. laga um meðferð sakamála er ákvæði um sérstakt hæfi dómara en þar segir að dómarar séu vanhæfir ef fyrir hendi séu „önnur atvik eða aðstæður sem séu til þess fallin að draga óhlutdrægni þeirra með réttu í efa."

Dómarar huga sjálfir að hæfi sínu og úrskurða raunar sjálfir um eigið hæfi sé það dregið í efa. En þá er stóra spurningin hvort Einar Ingimundarsson hafi sérstaklega vakið athygli á sínum tengslum og hugsanlegu vanhæfi sínu.

Vaktirðu athygli Arngríms Ísbergs á hugsanlegu vanhæfi þínu? „Ég vakti athygli Arngríms á því að ég væri starfsmaður Íslenskra verðbréfa og Byr hf. væri stærsti hluthafi þess félags, en varðandi einhver tengsl mín við Atla Örn, sem vissulega vinnur hjá Íslenskum verðbréfum, þá flaug það mér ekki til hugar að það gætu verið einhver vanhæfistengsl þar á milli," segir Einar Ingimundarson.

Vissi að Atli Örn hefði verið vitni

Einar segist að hafa vitað af því að Atli hefði verið meðal vitna ákæruvaldsins á rannsóknarstigi, en Exeter málið hafi aldrei verið rætt í vinnunni. „Ég vissi að hann hefði farið í einhverjar skýrslutökur en ég vissi ekki að hann væri vitni í málinu, en ég vissi að hann hefði farið í skýrslutökur, já," segir Einar.

Samkvæmt upplýsingum fréttastofunnar var sérstakt hæfi dómaranna ekki sérstaklega kannað við úhlutun málsins. „Við vissum að hann væri að vinna hjá Íslenskum verðbréfum en varðandi tengslin við Atla Örn Jónsson, við þekktum þau ekki," segir Björn Þorvaldsson, saksóknari sem sótti málið. Björn segist raunar fyrst hafa fengið vitneskju um slíkt í fjölmiðlum.

Arngrímur Ísberg, héraðsdómari og dómsformaður í málinu, sagði við fréttastofu í dag að Einar hefði verið valinn til vera meðdómsmaður því hann hafi verið talinn hæfur til þess. Enginn hafi gert athugasemdir við hæfi Einars eftir að málinu var úthlutað eða undir rekstri málsins.

En gerði Einar grein fyrir sínum tengslum? „Ég þarf að fletta því upp. Ég get ekki svarað þessu nema kanna þetta sérstaklega. En nú hef ég dæmt í þessu máli og það er mér óviðkomandi hér eftir," sagði Arngrímur, en þess ber að geta að dómurum er mjög þröngt sniðinn stakkur til að tjá sig um mál sem þeir hafa dæmt í.

Við úthlutan mála hjá Héraðsdómi er það svo að það er dómstjórinn sem úthlutar málum til annarra dómara. Óskaði Arngrímur sérstaklega eftir því að fá að dæma í Exeter-málinu? „Ég hef verið dómari í 25 ár og ég hef aldrei óskað sérstaklega eftir máli," sagði hann í samtali við fréttastofu.

Ákvörðun um áfrýjun málsins er í höndum Sigríðar J. Friðjónsdóttir ríkissaksóknara en engin ákvörðun hefur verið tekin ennþá, samkvæmt upplýsingum fréttastofu. thorbjorn@stod2.is