Þremenningarnir sem ákærðir voru í hinu svokallaða Exeter-máli voru allir sýknaðir í Héraðsdómi Reykjavíkur í gærmorgun. Málið er annað mál sérstaks saksóknara sem endar með dómi, en í fyrra málinu, sem snerist um innherjasvik Baldurs Guðlaugssonar, var sakborningurinn fundinn sekur.

Í Exeter-málinu voru fyrrverandi æðstráðendur Byrs, sparisjóðsstjórinn Ragnar Z. Guðjónsson og stjórnarformaðurinn Jón Þorsteinn Jónsson, ákærðir fyrir umboðssvik. Þeim var gefið að sök að hafa brotið flestar lánareglur þegar þeir ákváðu í sameiningu að lána félaginu Exeter Holding samtals milljarð króna. Féð var síðan notað til að kaupa stofnfjárbréf í Byr af MP banka og starfsmönnum Byrs svo ekki yrði gengið að þeim.

Dómurinn var fjölskipaður. Fyrir honum fór Arngrímur Ísberg, en meðdómendur voru Ragnheiður Harðardóttir og sérfræðingurinn Einar Ingimundarson, forstöðumaður lögfræðisviðs Íslenskra verðbréfa.

Arngrímur og Einar voru sammála um að sýkna bæri alla þrjá. Niðurstaða þeirra er sú að Ragnar hafi haft heimild til að veita há lán einn síns liðs, án aðkomu stjórnar eða lánanefndar, og að verulegur vafi leiki á um hvort stofnfjárbréfin hafi verið ófullnægjandi trygging fyrir láninu eins og ákæruvaldið heldur fram.

Segir í niðurstöðunni að tvímenningarnir, einkum Ragnar, hafi sannarlega farið á svig við lánareglur með því að kanna ekki stöðu lántakandans og hafi auk þess verið vanhæfir til að veita hærra lánið af tveimur.

Þetta tvennt breyti því ekki að mönnunum hafi ekki mátt vera ljóst í október 2008 að með lánveitingunni myndu þeir skuldbinda sparisjóðinn þannig að hann biði tjón af, eins og síðar varð raunin. Ásetningur þeirra hafi því ekki staðið til þess að misnota aðstöðu sína og stefna fé sjóðsins í hættu.
Ragnheiður skilar hins vegar sératkvæði og vill sakfella Jón Þorstein og Ragnar. Varúðar hafi ekki verið gætt við lánveitinguna, eins og reglur hafi kveðið á um, og mönnum hljóti að hafa verið ljóst á þessum tíma að sjóðurinn hefði beðið töluvert tjón af hruni fjármálakerfisins og að virði stofnfjárbréfanna hefði þar með rýrnað. Þau hafi aldrei getað talist fullnægjandi trygging fyrir láninu.

Allir dómarar eru hins vegar sammála um að sýkna beri Styrmi Þór Bragason, fyrrverandi forstjóra MP banka, af ákæru um hlutdeild í umboðssvikum hinna fyrrnefndu og peningaþvætti.

stigur@frettabladid.is