Hæstiréttur staðfestir tveggja ára dóm yfir íkveikjumanni

Hæstiréttur staðfesti í dag tveggja ára fangelsisdóm yfir Auðuni Þorgrími Þorgrímssyni fyrir að hafa borið eld að íbúð að Tryggvagötu í Reykjavík í janúar 2009.

Maðurinn var sakfelldur fyrir að hafa hellt bensíni úr plastbrúsa inn í stigagang húsnæðisins og á gólf jarðhæðar hússins og kveikt í. Húsið varð alelda og komst einn íbúi hússins með naumindum út áður en eldurinn breiddist út.



Í aðalmeðferð málsins fyrir héraðsdómi játaði Auðunn sök í málinu og kvaðst hafa komist að því að fyrrum eiginkona hans, sem þarna átti heima, hefði verið í tygjum við tvo aðra karlmenn sem hún hefði einnig haft fé af. Hún hafi hringt í hann fyrr um morguninn og vakið hann en hann hafði verið á nokkurra daga fylliríi. Hún hafi verið „hálf geggjuð" eins og hann orðaði það. Hann hafi þá í reiði tekið „þá skyndiákvörðun að loka þessu greni" með því að kveikja í því. Hafi hann komið því strax í verk með því að fara þangað og hella þar bensíni úr plastbrúsa sem hann vissi að var í baðherbergi á efri hæð hússins ásamt öðrum eldfimum efnum tilheyrandi tælenskum veitingastað í nálægu húsi. Í dómi héraðsdóms segir ennfremur að hann hafi verið með eldspýtur á sér enda hafi hann reykt á þessum tíma.

Segist hafa gengið úr skugga um að enginn væri í húsinu

Að sögn mannsins voru útidyrnar ólæstar, enda læsingin ónýt. „Hafi hann tekið bensínbrúsann þarna inni og rekið út stúlku sem þarna var inni. Þá hafi hann gætt að því hvort fleiri væru í húsinu með því að líta inn í íbúðarherbergin. Hann hafi svo hellt bensíninu yfir stigann og kveikt í. Að þessu loknu hafi hann farið heim til sín." Maðurinn fullyrti ennfremur að fyrir utan leiguherbergi hafi í húsinu margs konar starfsemi viðgengist, „svo sem vændi, kjötiðnaður fyrir tælenskan veitingastað, fíkniefnasala, viagra-dreifing, inn- og útflutningsverslun og fleira. Hann kveðst hafa heyrt að til stæði að rífa húsið og byggja nýtt á lóðinni."

Konan sem var inni í íbúðinni skýrði frá því að hún hafi verið nývöknuð þegar hún hafi heyrt skrölta í póstlúgunni. Þegar hún hafi að gáð sá hún hvar einhver tróð sígarettu inn um lúguna. „Hafi hún opnað dyrnar og spurt hvað væri á seyði en maðurinn þá ýtt henni frá og út úr húsinu. Hann hafi svo kveikt í bensíni en hún hlaupið út á veitingastofuna Krua Thai. Hún segist aðspurð ekki hafa orðið vör við það að maðurinn aðgætti hvort fólk væri þarna áður en hann kveikti í," að því er segir í dómi héraðsdóms.